Monday, May 17, 2010

രണ്ടു കള്ളികള്‍

ണ്ടു കള്ളികളുടെ കഥയാണിത്. കഥയല്ല, നടന്ന സംഭവം.

ഒരു കള്ളി ഞാന്‍ തന്നെ. മറ്റേ കള്ളി എന്നെക്കാള്‍ ഒരഞ്ചാറു വയസ്സിനു മൂപ്പുള്ള ഒരു കൂട്ടുകാരി. തല്‍ക്കാലം കുമാരി ചേച്ചി എന്നു വിളിക്കാം. സമവയസ്കരായ കൂട്ടുകാരോടുള്ള സ്വാതന്ത്ര്യമൊന്നും ഈ ചേച്ചിക്കൂട്ടുകാരിയോടെടുക്കില്ല ഞാന്‍. ഇത്തിരി ഭയഭക്തിബഹുമാനങ്ങളും അതുമൂലമുള്ള ഒരകല്‍ച്ചയും ഉണ്ടു താനും.

ഞങ്ങള്‍ കള്ളികളായതെങ്ങനെ എന്നല്ലേ? പറയാം.

മഴയാകട്ടേ, വെയിലാകട്ടേ കുടയെടുക്കുന്ന ശീലമേയില്ലയെനിക്ക്. വീട്ടില്‍ അഞ്ചാറു കുടകള്‍ ഇരുപ്പുണ്ട്, ടു ഫോള്‍ഡും ത്രീ ഫോള്‍ഡുമൊക്കെയായി. ഒന്നോ രണ്ടോ എണ്ണം കാശു കൊടുത്ത് വാങ്ങിയത്. ബാക്കിയുള്ള മൂന്നാലെണ്ണം സുഹൃത്തുക്കളോ ബന്ധുക്കളോ ഒക്കെ സമ്മാനിച്ച ഫോറിന്‍ കുടകള്‍.

എന്നാലും വീട്ടില്‍ നിന്നിറങ്ങുമ്പോള്‍ ഒന്നെടുത്ത് കക്ഷത്തോ ബാഗിലൊ വയ്ക്കാന്‍ തോന്നണ്ടേ?
ഇനി തോന്നിയാലോ, അന്ന് വൈകുന്നേരം തന്നെ ആ കുടയുടെ വാസം ഏതോ അജ്ഞാതനായ വ്യക്തിയുടെ വീട്ടിലാകും. പാവം കുട. അതെന്റെ വീട്ടില്‍ തന്നെ മഴയും വെയിലും ഏല്‍ക്കാതെ സസുഖം വാണുകൊള്ളട്ടേ.

അങ്ങനെ ഒരു പ്രവൃത്തിദിവസം. എനിക്ക് പോസ്റ്റോഫീസില്‍ പോയേ തീരൂ. പോകുന്ന വഴിയില്‍ ഫോട്ടോസ്റ്റാറ്റ് എടുക്കണം, പുതിയ പേന വാങ്ങണം, അങ്ങനെ പല കാര്യങ്ങള്‍.

മഴ തിരി മുറിയാതെ പെയ്യുന്നു. പതിവു പോലെ കൈയില്‍ കുടയില്ല.

കുമാരി ചേച്ചിയുടെ കുട തല്‍ക്കാലത്തേക്ക് കടം വാങ്ങാം. ചോദിച്ച ഉടനേ ചേച്ചി കുട തന്നു.

ദൈവമേ, ഇതും കൊണ്ടു കളയുമോ എന്ന ഭീതിയോടെ തന്നെയാണ് ചേച്ചിയുടെ കൈയ്യില്‍ നിന്നാ കുട വാങ്ങിയത്.

മനസ്സിനെ ‍ പലയാവര്‍ത്തി പറഞ്ഞു മനസ്സിലാക്കിച്ചു - ഇതു കുമാരി ചേച്ചിയുടെ കുടയാണ്, കൊണ്ട് കളഞ്ഞേക്കരുത്, എവിടെയും മറന്നു വച്ചേയ്ക്കരുത് എന്നൊക്കെ. എല്ലാം തലകുലുക്കി സമ്മതിച്ചു എന്റെ മനസ്സെന്ന കള്ളി. പിന്നെ തന്നത്താന്‍ ഒരു ഭീഷ്മശപഥവും ചെയ്തു - എന്തു വന്നാലും കുടയെ കൈയില്‍ നിന്ന് വേര്‍പെടുത്തുകയില്ല.

അങ്ങനെ കുമാരിച്ചേച്ചിയുടെ ടു ഫോള്‍ഡ് കുടയും കൊണ്ട്, ‍ ഒരു വിധം ശക്തിയായി തന്നെ പെയ്യുന്ന മഴയത്തേക്ക് ഇറങ്ങി.

ആഹാ! കുട നിവര്‍ത്തിയപ്പോള്‍ കണ്ട ദൃശ്യം അതിമനോഹരം ! ഇരുണ്ട ആകാശത്ത് നിറയെ നക്ഷത്രം പൂത്തപോലെ !

നക്ഷത്രഓട്ടകള്‍ പക്ഷേ തീരെ കുഞ്ഞായിരുന്നു. അതിലൂടെ വെള്ളം ഊര്‍ന്നിറങ്ങി ഒരു തുള്ളിയായി രൂപാന്തരപ്പെട്ട്, ഭൂഗുരുത്വാകര്‍ഷണത്തില്‍ പിടിച്ചു നില്‍ക്കാനാവാതെ താഴോട്ടു നിപതിക്കാന്‍ ഇത്തിരി സമയം എടുക്കും.

ആ, സാരമില്ല, ഒന്നും ഇല്ലാത്തതിലും ഭേദമല്ലേ ഈ നക്ഷത്രക്കുടയെങ്കിലും കൈയിലുള്ളത്? ‍ കുമാരിച്ചേച്ചിക്ക് മനസ്സാ നന്ദി പറഞ്ഞു.

കാര്യങ്ങളെല്ലാം സാധിച്ചു. ഫോട്ടോസ്റ്റാറ്റ് എടുത്തു, പേന വാങ്ങി, പോസ്റ്റോഫീസില്‍ പോയി അങ്ങനെ എല്ലാം കഴിഞ്ഞു വിജയശ്രീലാളിതയായി തിരിച്ചു വന്നു.

ഇതിനിടയില്‍ എപ്പോഴോ മഴ തോര്‍ന്നിരുന്നു.

ചെയ്യുന്ന ജോലിയില്‍ ഭയങ്കര ഏകാഗ്രതയാണെനിക്ക്. അതിനാല്‍ ഈ മഴ എപ്പോഴാണ് തോര്‍ന്നതെന്ന് ഒരു പിടിയും ഇല്ല.

എന്തിനേറെ പറയണം? അനിവാര്യമായത് സംഭവിച്ചു. തിരിച്ചു വന്നപ്പോള്‍ മഴയില്ലാത്തതു കാരണം കൈയില്‍ കുടയുമില്ല!

തിരിച്ചു വന്ന് കുമാരി ചേച്ചിയെ കണ്ടപ്പോഴാണ് നടുക്കുന്ന ആ സത്യം ഒരഗ്നിപര്‍വ്വതം പോലെ മനസ്സില്‍ പൊട്ടിത്തെറിച്ചത്.

കുമാരിചേച്ചിയുടെ കുടയും താന്‍ കൊണ്ട് കളഞ്ഞിരിക്കുന്നു. കുടയും കൊണ്ട് പുറപ്പെട്ടപ്പോള്‍ എടുത്ത ഭീഷ്മശപഥം എപ്പോഴാണ് ഉരുകിപ്പോയത്?

ദൂരെ നിന്ന് മറ്റൊരാളോട് സംസാരിക്കുകയാണ് ചേച്ചി. എന്നെ കണ്ടിട്ടില്ല. പതുക്കെ അവിടെ നിന്ന് മുങ്ങി. പോയിടങ്ങളിലൊക്കെ ഒന്നുകൂടി പോയി നോക്കി. കിം ഫലം?
പോയതു പോയി.

പിന്നെ, തിരിച്ചു ചെല്ലാതെ, വെളിയില്‍ നിന്നു തന്നെ ചേച്ചിക്ക് ഫോണ്‍ ചെയ്തു.

- വീട്ടില്‍ ഒന്നു പോകണമായിരുന്നു. ചേച്ചിക്ക് ഉടനെ തന്നെ കുട വേണോ?

- വേണ്ട, കുഴപ്പമില്ല. വീട്ടില്‍ പോയിട്ടു വരൂ -

ലഞ്ച് ബ്രേക്കിന്റെ സമയമാവാറായിരുന്നു. ലഞ്ച് ബാഗില്‍ തന്നെ ഉണ്ടായിരുന്നു എങ്കിലും വീട്ടിലേക്ക് വച്ചുപിടിച്ചു.

എന്റെ ഉദ്ദേശ്യമെന്തെന്ന് പറയാതെ തന്നെ മനസ്സിലായിക്കാണുമല്ലോ. ചേച്ചിയുടെ കുട ഞാന്‍ കൊണ്ടു കളഞ്ഞു എന്നു പറയാന്‍ വന്‍‌പേടി. അപ്പോള്‍ വീട്ടിലിരിക്കുന്നതില്‍ നിന്ന് ഒരു കുടയെടുത്ത് ചേച്ചിക്ക് നല്‍കുക.

ഞാന്‍ ഉള്ളതില്‍ വച്ച് പഴയ ഒരു കുട എടുത്തു ബാഗില്‍ വച്ചു. പഴയതാണെങ്കിലും അതു നിവര്‍ത്തിയാല്‍ നക്ഷത്രാവൃതമായ ആകാശം വിരിയില്ല കേട്ടോ.

ചേച്ചിയുടെ അടുത്ത് ചെന്ന് വളരെ നിഷ്കളങ്ക ഭാവത്തില്‍ പറഞ്ഞു.

- ചേച്ചീ, ഇതു തന്നെയോ ചേച്ചിയുടെ കുട? കുറേ കുടകള്‍ ഇരിപ്പുള്ള കൂട്ടത്തില്‍ കൊണ്ടു വച്ചതു കൊണ്ട് ചേച്ചിയുടെ കുട ഏതെന്ന് തിരിച്ചറിയാന്‍ പറ്റിയില്ല -

ചേച്ചി ആ കുട വാങ്ങി നിവര്‍ത്തി നോക്കി.
എന്നിട്ട് മുഖം ചുളിച്ച് പറഞ്ഞു

- ഏയ് ഇതല്ല കേട്ടോ എന്റെ കുട ‌-

- ശരി ഇപ്പോള്‍ ഇതു വച്ചോളൂ . നാളെ ഞാന്‍ ചേച്ചിയുടെ കുട എടുത്തു കൊണ്ടു വരാം -

ചേച്ചി സമ്മതിച്ചു.

അങ്ങനെ തല്‍ക്കാലം രക്ഷപ്പെട്ടു.

പിറ്റേന്ന് കൂട്ടത്തില്‍ നിന്ന് ‍ ഇത്തിരി നല്ലൊരു കുട തന്നെ എടുത്തു വച്ചു. ഇനി ഇതുമല്ല, നക്ഷത്രപ്പൂക്കള്‍ വിരിയുന്ന കുട തന്നെ വേണമെന്ന് ചേച്ചി ശഠിക്കുകയാണെങ്കില്‍ കുറ്റം ഏറ്റു പറഞ്ഞ് മാപ്പിരക്കാം എന്ന് മനസ്സിനെ ധൈര്യപ്പെടുത്തി.

പുതിയ കുടയുമായി ചേച്ചിയുടെ അടുത്തെത്തി.

ചേച്ചി കുട വാങ്ങി നിവര്‍ത്തി നോക്കി.

- ആ, ഇതു തന്നെ എന്റെ കുട -

ദൈവമേ ! സമാധാനമായി.

ചേച്ചി ആ കുട മൂന്നായി മടക്കി ബാഗിനുള്ളില്‍ വയ്ക്കുന്നതു കണ്ട് മനസ്സു തണുത്തു.

മറ്റുള്ളവരുടെ വസ്തുക്കള്‍ കൈകാര്യം ചെയ്യുന്നത് ഇത്രയും ഉത്തരവാദിത്വരഹിതമായാണോ എന്ന പഴി കേള്‍ക്കുന്നതില്‍ നിന്ന് തല്‍ക്കാലം രക്ഷപ്പെട്ടില്ലേ?

- ഗീത -

------------------------------------------------------------

ഈ രണ്ടു കള്ളികളോടും വായനക്കാര്‍ പൊറുക്കണേ.

51 comments:

അലി said...

ഈ കുമാരിച്ചേച്ചി ആളു കൊള്ളാലോ
കൊച്ചുകള്ളീ!

നല്ല അവതരണം. ഇഷ്ടപ്പെട്ടു.

Manoraj said...

പഴയ മരംവെട്ടുകാരനെ ഓർമ്മിപ്പിച്ചു

കുമാരന്‍ | kumaran said...

കൊള്ളാം. രസായിട്ടുണ്ട്.

ശ്രീ said...

ഹ ഹ. ഇതൊരു ഒന്നൊന്നര പോസ്റ്റ് തന്നെ ചേച്ചീ...

എന്നാലും കുട പോയി എന്ന് പറയാതെ സ്വന്തം കുട കൊടുക്കാനും അത് മറ്റൊരു രീതിയില്‍ അവതരിപ്പിയ്ക്കാനും തോന്നിയ ബുദ്ധി സമ്മതിച്ചു. (ഞാനാണെങ്കില്‍ അങ്ങനത്തെ ബുദ്ധി ഒന്നും വരില്ല. പകരം, കാലു പിടിച്ച് മാപ്പും പറഞ്ഞ് പുതിയ കുട വാങ്ങി കൊടുക്കാനേ ചിന്തിയ്ക്കൂ)

എറക്കാടൻ / Erakkadan said...

ആവൂ എന്റെ ചേച്ച്യേ...

ramanika said...

ചേച്ചി ആളു കൊള്ളാം ........

വീ കെ said...

ചേച്ചിയും കൊള്ളാം...
കൂട്ടുകാരിയും കൊള്ളാം... രണ്ടും കടകട്ട....!!

Anya said...

Hi Geetha
Nice to see a new post!!
I hope all is well.....
Have a nice day
greetings
Kareltje =^.^-
Anya :)

krishnakumar513 said...

മികച്ച അവതരണ ശൈലിയും,നല്ല കഥയും...

sm sadique said...

കാലൻ കുട.............
ഉഗ്രൻ കള്ളികൾ.......
നല്ല അനുഭവം......
എനിക്കും സംഭവിച്ചിട്ടുണ്ട്.......
ഇനിയും സംഭവിക്കാം......
നല്ല കഥ.........

ചേച്ചിപ്പെണ്ണ് said...

nalla kadha ...
pakshe ini valla vazhikku pokumbam avanavante kuda thanne eduthukond pone ..
allenkil ..!!!!!!

ബിലാത്തിപട്ടണം / BILATTHIPATTANAM. said...

ഇതിനെയാണ് പറയുന്നത്
ചീങ്കണ്ണിക്ക് മരപ്പട്ടി കൂട്ട് എന്ന്

എന്തായാലും വിവരണം അസ്സലായി കേട്ടൊ ഗീത

vinus said...

ഹൊ എന്നാലും ടൂ ഫോൾഡ് കുട വാങ്ങിച്ച് ഒന്നുമറിഞ്ഞില്ലേ പറഞ്ഞ് ത്രീ ഫൊൾഡ് കൊണ്ട് കൊടുത്ത ചങ്കൂറ്റം ഭീകരം ഇത് തന്നെ കുടാന്ന് പറഞ്ഞ് വാങ്ങിച്ചു വെച്ചത് അതിഭീകരം .ദോഷം പറയരുതല്ലോ നല്ല ചേരുന്ന ടൈറ്റിൽ. ലളിതമായ് സരസമായ് പറഞ്ഞ പോസ്റ്റിഷ്ട്ടപ്പെട്ടു

കൂതറHashimܓ said...

ബെസ്റ്റ് കൂട്ട്

പട്ടേപ്പാടം റാംജി said...

കൂട്ടുകാരിയും കൂട്ടുകാര്യുടെ കൂട്ടുകാരിയും കൊള്ളാം.
ഒന്നിനൊന്ന് മെച്ചം.
തമാശ പോലെ എഴുതിയതെങ്കിലും ഇപ്പോള്‍ ഇത്തരം മറവികള്‍ എല്ലാരിലും സര്‍വ്വസാധാരനമായിരിക്കുന്നു എന്നത് സത്യം.
രസമായി പറഞ്ഞു,ഒരു കല്ലുകടിയുമില്ലാതെ.

SULFI said...

ആഹാ....... ഇതോ കുട പുരാണം......
ഏതായാലും ആദ്യ വരവില്‍ തന്നെ കുടക്കഥയിലുടക്കി നിന്നു ഞാന്‍.
കുടുക്കി എന്ന് പറയുന്നതാവും ശരി......... ഏതായാലും ഞാനുമുണ്ടിനി.. കുട പുരാണം കേള്‍ക്കാന്‍.
മറവിയില്‍ PHD എടുത്ത ആളാ ഞാന്‍. എന്നോട് വേണ്ടാ കളി.
നല്ല അവതരണം. ലളിതം.... ഇഷ്ട്ടായി.. അഭിനന്ദനങ്ങള്‍.

ഗീത said...

അലി, ആദ്യകമന്റിനും പോസ്റ്റ് ഇഷ്ടപ്പെട്ടതിനും നന്ദി.

മനോരാജ്, ശരിയാണ്.

കുമാരന്‍, സന്തോഷം.

ശ്രീ, അപ്പോള്‍ ഞാന്‍ ബുദ്ധിശാലി തന്നെ അല്ലേ? :)
കാലു പിടിച്ച് മാപ്പു പറയാനൊന്നും പ്രയാസമില്ല, പക്ഷേ അതിനു മുന്‍പേ കുട കൊണ്ടു കളഞ്ഞു എന്നു പറയണ്ടേ? അതിനുള്ള ധൈര്യം തീരെ ഇല്ലായിരുന്നു ശ്രീ. :)

എന്തോ എന്റെ എറക്കാടാ...

രമണിക, കൊള്ളാം ല്ലേ ???

വി.കെ., രണ്ടും കടകട്ട....!! - അദ് തന്നേ...


Anya, Thanks a lot. Hugs for Kareltje!
കൃഷ്ണകുമാര്‍, വളരെ സന്തോഷം.

സാദിക്ക്, നല്ല അനുഭവമെന്നോ? എന്റെ ദൈവമേ! എന്നിട്ട്, ഇനിയും സംഭവിക്കാംന്നുംകൂടി പ്രവചിച്ചിരിക്കുന്നു. അതെനിക്കല്ലല്ലോ, സാദിക്കിനല്ലേ? അല്ലേ?

ചേച്ചിപ്പെണ്ണേ, ശരിയാണ്. അങ്ങനെ തന്നെ ചെയ്യാം. അല്ല, അങ്ങനെയേ ചെയ്യൂ.

ബിലാത്തീ, ഇതാണ് ഈ ബിലാത്തിയിലൊക്കെ പോയാലുള്ള കുഴപ്പം. മലയാളത്തിലെ പഴഞ്ചൊല്ലുകളൊക്കെ തെറ്റിച്ചു പറയും. മരപ്പട്ടി കൂട്ട് ഈനാം‌പേച്ചിക്കാണ് കേട്ടോ, ചീങ്കണ്ണിക്കല്ല. ഇനി പഴഞ്ചൊല്ലുകള്‍ പറയണമെന്നോ എഴുതണമെന്നോ ഒക്കെ തോന്നുമ്പോള്‍ എന്നെ ഒന്നു കണ്‍സള്‍ട്ട് ചെയ്തോളൂ... :) :)

വിനു, കള്ളികള്‍ മാത്രമല്ല, ഭീകരിയും അതിഭീകരിയും തന്നെ അല്ലേ? ഈ ഭീകരിപോസ്റ്റ് വായിച്ച് ഇഷ്ടപ്പെട്ടതില്‍ വളരെ സന്തോഷം.

ഹാഷിം, കൂട്ടായാല്‍ ഇങ്ങനെ വേണം അല്ലേ? :)

റാംജി, കൂട്ടുകാരികളെ ഇഷ്ടായി അല്ലേ? ശരിയാണ് മറവി ഇപ്പോള്‍ ചെറുപ്രായത്തിലേ വരുന്നു. ആ നല്ല വാക്കുകള്‍ക്ക് നന്ദി.

ഗീത said...

സുള്‍ഫീ, സുസ്വാഗതം ഇവിടേക്ക്. തീര്‍ച്ചയായും ഇനിയും വരണം. സുള്‍ഫിയെ പോലെ തന്നെ എനിക്കും കിട്ടിയിട്ടുണ്ട് മറവിക്ക് ഡിഗ്രിയും സ്ഥാനമാനങ്ങളും ഒക്കെ. ഞാന്‍ കോളേജില്‍ ജോയിന്‍ ചെയ്ത കാലത്ത്, ഒരു സീനിയര്‍ ടീച്ചര്‍ പറഞ്ഞു - ഇവിടത്തെ യങ്ങസ്റ്റ് മെംബറാണ്, പക്ഷേ മറവിയുടെ രാജ്ഞി!

Rare Rose said...

ഹി.ഹി.കൊള്ളാല്ലോ ഗീതേച്ചീ.രണ്ടും നല്ല പഠിച്ച സൂത്രക്കാരികള്‍ തന്നെ.കുടമറവിയില്‍ മോശമല്ലാത്തോണ്ട് ഇനി ഞാനും ഈ സൂത്രം പ്രയോഗിച്ചാലോന്നൊരാലോചന.:)
പിന്നെ ഈ രസമുള്ള കുഞ്ഞെഴുത്ത് നല്ലോണമിഷ്ടായി.:)

വഷളന്‍ | Vashalan said...

ചക്കിക്കൊത്തൊരു ചങ്കരി.

ഇനി പഴഞ്ചൊല്ല് തെറ്റി എന്ന് തെറിവിളിക്കല്ലേ. ബില്ലുവിനു തെറ്റിയതൊന്നുമല്ല. ആളൊരു ബുദ്ധിമാനാ. ഈനാമ്പേച്ചി എന്ന് വിളിക്കണ്ട എന്ന് കരുതി respect തന്നതല്ലേ.

Typist | എഴുത്തുകാരി said...

കൂട്ടുകാരിയും കൊള്ളാം, കൂട്ടുകാരി ചേച്ചിയും കൊള്ളാം. എന്നാ‍ലും എവിടന്നു കിട്ടി ഈ ബുദ്ധി!‍ ഞാനാണെങ്കില്‍ ശ്രീ പറഞ്ഞപോലെ മാപ്പാക്കണമെന്നു പറഞ്ഞ് ഒരു പുതിയ കുടയും വാങ്ങിക്കൊടുത്തേനേ.

ബിജുകുമാര്‍ said...

ഗീതാ, സംഗതി സൂപ്പര്‍ ...
അവതരണം ഉഗ്രന്‍ . നല്ല കൈയടക്കം. ഇതെങ്ങാനും കുമാരിചേച്ചി വായിയ്ക്കുമോ ആവോ

ബിജുകുമാര്‍ said...

ഇനിയും ഇത്തരം കഥകള്‍ വരട്ടെ

എ.ആർ രാഹുൽ said...

കൊള്ളാം നന്നായിരിക്കുന്നു...

Anya said...

Thank you very much Geetha
for your long comment on my blog :))
You are so sweet for me THANKS !!
I liked the story very much :)
THANKS :))))))

എന്‍.ബി.സുരേഷ് said...

അല്ല ഈ കുമാരിച്ചേച്ചി കളയാന്‍ തന്ന കുടയല്ലേ അത്?
അധികമായാല്‍ അമൃതും വിഷം എന്നു കേട്ടിട്ടുണ്ട്.
വീട്ടില്‍ അഞ്ചാറു ഫോറിന്‍ കുട ഇരിക്കുമ്പോള്‍ കളഞ്ഞാലെന്ത്, ഇല്ലെങ്കിലെന്ത്?

ചേച്ചിയും കൊള്ളാം അനിയത്തിയും കൊള്ളാം

ഇപ്പോഴും ആ സ്വഭാവം ഉണ്ടോ കുട കളയുന്ന പരിപാടി.?

ഗീത said...

റോസേ, വേണ്ടാട്ടോ, വീട്ടിലുള്ള കുടകള്‍ ഒന്നൊന്നായി പോയികിട്ടും. ഈ കുഞ്ഞു റോസിന്റെ കുഞ്ഞു കമന്റും ഇഷ്ടമായി.

വഷളന്‍, ഈ പഴഞ്ചൊല്ലും തെറ്റല്ല എന്നു പറയാതിരിക്കാനൊന്നും പറ്റൂല്ല കേട്ടോ :)
അല്ലേ, ഈ U.Sല്‍ ഇരിക്കുന്ന ആളെന്തിനാ മണ്ടന്‍ ഓഫ് ലണ്ടന്‍ എന്ന ഡിഗ്രി സ്വയം അവാര്‍ഡ് ചെയ്തിരിക്കുന്ന ബില്ലൂന് വേണ്ടി വക്കാലത്ത് എടുക്കുന്നത്? ബില്ലൂന് അത്രയ്ക്ക് റെസ്പെക്ട് ആണെന്നോ? ഓ, മനസ്സിലായി. ഒരു മണ്ടനല്ലേ മറ്റൊരു മണ്ടിയെ ഇത്രേം റെസ്പെക്ട് ചെയ്യാന്‍ പറ്റൂ...

ദേ, ഈ എഴുത്തുകാരീം പറയുന്നു ഭയങ്കര ബുദ്ധീന്ന്. നന്ദി കേട്ടോ. ഇതിപ്പോ ഒരു പുതിയ കുട കാശു കൊടുത്ത് മേടിക്കേണ്ടി വന്നില്ല എന്നൊരു വ്യത്യാസമല്ലേ ഉള്ളൂ എഴുത്തുകാരീ???? :)

ബിജു, അയ്യോ കുമാരി ചേച്ചി വായിക്കുമെന്നോ? ഹെന്റമ്മേ അങ്ങനെ പറഞ്ഞ് പേടിപ്പിക്കല്ലേ. ഇനി അഥവാ വായിച്ചാല്‍...
ഇതെഴുതിയത് ഞാനേ അല്ല, എന്റെ ജീവിതത്തില്‍ ഇങ്ങനൊന്ന് സംഭവിച്ചിട്ടേയില്ല, കുട കടം വാങ്ങുന്ന പതിവേയില്ല, കുട കൊണ്ട് കളയുന്ന സ്വഭാവം തീരെയില്ല, വീട്ടില്‍ കുടയെന്ന സാധനം ഇന്നു വരെ വാങ്ങിച്ചിട്ടില്ല.....ഈ സത്യങ്ങളൊക്കെ അങ്ങുറക്കെ വിളിച്ചു പറയും. അത്രതന്നെ.

രാഹുല്‍, സന്തോഷം. ആദ്യമായിട്ടല്ലേ ഇവിടെ? ഇനിയും വരുമെന്ന് പ്രതീക്ഷിക്കുന്നു.

സുരേഷ്, അതും ശരിയായിരിക്കും, കളയാന്‍ തന്നതായിരിക്കും. ഈ മണ്ടച്ചാര്‍ക്ക് അതു മനസ്സിലാവണ്ടേ? പിന്നെ ഞാന്‍ തൊടാത്തതു കൊണ്ട് അഞ്ചാറ്‌ കുടകള്‍ ഒരുമിച്ച് വീട്ടിലിരുന്നു.
ഇപ്പോള്‍ കുട കൊണ്ടുപോകാറേയില്ല. മഴയാണെങ്കില്‍ നനയും, വെയിലെങ്കില്‍ കൊള്ളും. രണ്ടും സൌന്ദര്യത്തിനും ആരോഗ്യത്തിനും നല്ലതല്ലേ? :)

Anya, You too are so sweet to me! Thanks a lot for the second visit. Hugs and strokes for Dear Kareltje!

OAB/ഒഎബി said...

അഞ്ച് പവന്റെ ഒരു മുക്കു പണ്ടം തല്‍ക്കാലത്തേക്ക് വായ്പ തരാം.

കുറച്ച് ബുദ്ധിമുട്ടിലാണ്, സഹായിക്കണം.
വേണ്ടെന്ന് മാത്രം പറയരുത്.

the man to walk with said...

mm..kollaam..
ishtaayi

ഹംസ said...

ഹ ഹ ഹ… രണ്ട് കള്ളികളും കൊള്ളാം സത്യത്തില്‍ ഇതില്‍ ആരാ പെരുംകള്ളി എന്നാ സംശയം.. ചിലപ്പോള്‍ ആ ചേച്ചിക്ക് കാര്യം മനസ്സിലായിട്ടുണ്ടാവും അവരുടെ കുടെ നഷ്ടമായി എന്നുള്ള സത്യം അപ്പോള്‍ പിന്നെ കിട്ടിയതു ലാഭം എന്ന് കരുതി അതു തന്നെ എന്നു പറഞ്ഞതാവും .! എന്തായാലും കഥ അടിപൊളി തന്നെ.!!

Readers Dais said...

കൊള്ളാമല്ലോ കള്ളികള്‍ ...
ഒരു കുടയും രണ്ടു കള്ളിയും .. :)
വായന രസിച്ചു ...

വഴിപോക്കന്‍ said...

വളരെ ഇഷ്ടായി...ലളിതമായ ഇത്തരം കഥകളാണ് എനിക്കിഷ്ടം, മനസ്സറിഞ്ഞു എന്‍ജോയ് ചെയ്യാന്‍ പറ്റും എന്നത് തന്നെ കാരണം.
എന്നാലും ഇതുവരെ ഞാനിത് കണ്ടില്ലല്ലോ എന്നൊരു സംകടം.

Vayady said...

കള്ളി..കുടക്കള്ളി. എനിക്കിഷ്ടപ്പെട്ടു ഈ കള്ളിയെ...ഇനി ഞാന്‍ ഇവിടെ തന്നെ കാണും.:)

ജോഷി പുലിക്കൂട്ടില്‍ . said...

kollaam, nannayittundu

ഗീത said...

ഓഏബി, ഓ, മുക്കുപണ്ടം കൊണ്ടു വന്നോളൂ. ഞാനതിട്ട് കുറേനാള്‍ നടക്കാം. പിന്നെ കളഞ്ഞുപോയാല്‍ വീട്ടിലിരിക്കുന്ന 10 പവന്റെ മുക്കുപണ്ടം പകരം തരാം. ബുദ്ധിമുട്ടുന്നവരെ സഹായിക്കലാണ് എന്റെ ജീവിതവ്രതം തന്നെ. :) അപ്പോള്‍ നാളെത്തന്നെ അത് കൊണ്ടു വന്നോളൂ..

ദി മാന്‍ ടു..., സന്തോഷം കേട്ടോ.

ഹംസ, പെരുംകള്ളി ആരാന്ന്‌ ഹംസ തന്നെ പറയൂ. ഇഷ്ടായതില്‍ സന്തോഷം ഹംസ.

Readers dais, കള്ളികള്‍ കൊള്ളാംല്ലേ. ശരിയാണ് അങ്ങനെ ഇടാമായിരുന്നു തലക്കെട്ട് - ഒരു കുടയും രണ്ടു കള്ളികളും.

വഴിപോക്കന്‍, ആ നല്ലവാക്കുകള്‍ക്ക് എങ്ങനെ നന്ദി പറയാന്‍? അതിനും വേണ്ടിയൊക്കെയുണ്ടോന്നും സംശയം. വളരെ വളരെ സന്തോഷം.

വായാടി തത്തേ,“ഇനി ഞാന്‍ ഇവിടെ തന്നെ കാണും.:)”
എന്തിനാ, എന്റെ കള്ളത്തരം കണ്ടുപിടിക്കാനോ? കണ്ടുപിടിച്ചോളൂ, പക്ഷേ ആരോടും പറഞ്ഞേയ്ക്കരുത് കേട്ടോ. :)

ജോഷി, വളരെ സന്തോഷം. ആദ്യമായി വന്നതല്ലേ? സ്വാഗതം.

Naushu said...

രണ്ടു കള്ളികളും കൊള്ളാം...
നല്ല കഥയും. ഇഷ്ട്ടായിട്ടോ...

($nOwf@ll) said...

ചിരിച്ചു വീണു കേട്ടോ.. നല്ല അവതരണം.. ഇനിയും വരാമേ..

ഗീത said...

നൌഷു, കള്ളികളെ ഇഷ്ടമായതില്‍ സന്തോഷം. വായനയ്ക്ക് നന്ദി.

സ്നോഫാള്‍, തീര്‍ച്ചയായും ഇനിയും വരണം. നല്ല വാക്കുകള്‍ക്ക് നന്ദി.

അനില്‍കുമാര്‍. സി.പി. said...

ഒരു ‘കുഞ്ഞു’ കാര്യത്തിന്റെ രസകരമായ ഇമ്മിണി ‘വല്യ’ അവതരണം; ഇഷ്ടമായി.

SULFI said...

ഇവിടെയും സ്ഥിതി തഥൈവ. മാസം ഒന്നായല്ലോ. കല്ലികതയും പറഞ്ഞു മുങ്ങിയതാ. പിന്നെ ഇതേ വരെ പൊങ്ങിയത് കാണുന്നില്ല.

Echmukutty said...

ആരാണ് അധികം മിടുക്കി എന്ന് അയവെട്ടി വന്നിട്ട് പറയാം കേട്ടോ.
രണ്ട് മിടുക്കികൾ!

പാലക്കുഴി said...

ചേച്ചീ, ഇതു തന്നെയോ ചേച്ചിയുടെ കുട? കുറേ കുടകള്‍ ഇരിപ്പുള്ള കൂട്ടത്തില്‍ കൊണ്ടു വച്ചതു കൊണ്ട് ചേച്ചിയുടെ കുട ഏതെന്ന് തിരിച്ചറിയാന്‍ പറ്റിയില്ല -

എത്രമനോഹരമായ നുണ....

എത്രമനോഹരമായ നുണ.....
ഒരു ചെറിയ സംഭവം രസകരമായി അവതരിപ്പിച്ചു.

Mahesh Cheruthana/മഹി said...

ഗീതേച്ചി, തകര്‍ത്തു കളഞ്ഞു ഇതുപോലെ എക്സ്ചേഞ്ച് ഓഫര്‍ കാത്തിരിക്കുകയാകും ആ പാവം കള്ളിചേച്ചി

Kalavallabhan said...

ജൂണിൽ തുടർച്ചയായ മഴയായതു കാരണം കുടയൊന്നും നഷ്ടപ്പെടില്ല.

വേറെ കള്ളത്തരങ്ങളൊന്നും ജൂണിൽ തടഞ്ഞില്ലേ ?

ഗീത said...

അനില്‍, ‘കുഞ്ഞുവല്യ’കാര്യം ഇഷ്ടായതില്‍ സന്തോഷം. ഇനിയും വരണം.

സുള്‍ഫീ, ഭയങ്കര മടി.

എച്മു, മതി മതി അയവെട്ടി ആഹാരമൊക്കെ ദഹിച്ചതിനു ശേഷം വന്നു പറഞ്ഞാല്‍ മതി ആരാ മിടുക്കീന്ന്‌.

പാലക്കുഴീ, ആ നുണക്ക് ഇത്ര മനോഹാരിതയുണ്ടെന്ന് ഇപ്പഴാ മനസ്സിലായത്. :)

മഹി, “ആ പാവം കള്ളിചേച്ചി”- ആ ചേച്ചിയെക്കാള്‍ പാവം ഈ കള്ളിയല്ലേ?

കലാവല്ലഭാ, ജൂണായാലും ഇറങ്ങുമ്പോള്‍ മഴയില്ലെങ്കില്‍ കുടയെടുക്കാന്‍ തന്നെ മറന്നുപോകും. പിന്നെ മഴ വന്നാല്‍ സുന്ദരമായി നനയും. ഇന്നും നനഞ്ഞു. ജൂണ്‍ തീരാറായി. ഇതുവരെ ഒരു കള്ളത്തരവും തടഞ്ഞില്ല. ഇനി ജൂലായിലാവട്ടേ നോക്കാം. വല്ലതും തടഞ്ഞാല്‍ ഇതുപോലെ അറിയിക്കാം. :)

ബഷീര്‍ പി.ബി.വെള്ളറക്കാട്‌ said...

കൊള്ളാ‍ലോ രണ്ടാളും :)
ഞാനു കുട മറന്ന് വെക്കുന്ന നല്ല സ്വഭാവമുള്ള കൂട്ടത്തിലായിരുന്നു

എന്‍.ബി.സുരേഷ് said...

എന്താണു പുതിയ പോസ്റ്റ് ഇടാൻ ഇത്ര മടി. റ്റീച്ചർ അല്ലേ ഇത്ര ഉദാസീനത നന്നല്ല കേട്ടോ. ചൂരൽ എടുക്കണോ?

raadha said...

കുട പുരാണം കലക്കീട്ടോ..രണ്ടു കള്ളിമാരും മോശമല്ല ..നാളെയും കുമാരി ചേച്ചി സന്തോഷ പൂര്‍വ്വം കുട തരും. ഒന്ന് ചോദിച്ചു നോക്കൂ...

(വീട്ടിലെ സ്റ്റോക്ക്‌ തീരുന്നത് വരെ മതി ട്ടോ )

:)

Mahesh Cheruthana/മഹി said...

ഗീതേച്ചി,
പണ്ടേ പാവമല്ലേ....

ഗീത said...

ബഷീര്‍, നമുക്ക് പലകാര്യങ്ങളിലും ഒരുമയുണ്ടല്ലേ? പൂച്ചസ്നേഹം, കുടമറക്കല്‍...

സുരേഷ്, അയ്യോ വേണ്ട. ദേ പുതിയ പോസ്റ്റ് ഇട്ടു.

രാധ, സന്തോഷം വായിക്കാന്‍ വന്നതില്‍. ഇപ്പോള്‍ കുട കടം വാങ്ങേയില്ല. :)

മഹീ, അങ്ങനെ സമ്മതിച്ചല്ലോ അല്ലേ? :) മഹിയും

Ajay said...

This is remarkable, when you speak about your true experiences, the story becomes most attractive, well , I liked it so much
ajay